لو حضرتك ضيف عزيز على اسكندرية جيت قعدت يومين ورجعت فانا متأكد انك مشوفتش اسكندرية … مش لضيق الوقت ( يومين كفاية جدا انك تشوف اسكندرية كلها )
ولكن لانك غالبا روحت العناوين الرئيسية فقط … ميامي وشارع خالد ابن الوليد .. او اتصورت في القلعة او كوبري ستانلي .. رحت شوارع محطة الرمل الرئيسية وسان ستيفانو وشاطيء النخيل .. وممكن تكون كلت وجبة في البان سويسرا او سندوتشين فول وفلافل في محمد احمد او جاد او ابو ربيع .
يؤسفني اقولك ان دي مش اسكندريةالحقيقية دي اسكندرية بتاعة السياح اللي بتشوفها في الصور
لو عايز تشوف اسكندرية الحقيقية وتحس بنبض الناس والشوارع اسمع مني … لازم تروح حواري السيالة ..تمشي في شارع النصر وتدخل سوق زنقة الستات … وغيط العنب وكرموز وعامود السواري .. تمشي في شوارع وحواري كوم الدكة … تروح اللبان … تشرب حجر معسل في قهوة حمودة او واحد قهوة في قهوة ابو صابر في كامب شيزار .. مشربتش قهوة في البن البرازيلي في محطة الرمل ومطاحن البن الاهلية في شارع النبي دانيال وقهوة الاسعاف والقهوة الوطنية والتجارية في المنشية .. تاكل وجبة سمك وجمبري وفواكه بحر من اللول وزفير فالمكس 🚣🏄 او .. تشتري كتاب من منشاة المعارف او دار المعارف في شارع سعد زغلول . .. تمشي في شارع البوسطة القديمه في المنشية وتاكل سندوتش جبنة تركي وتشرب كوباية لبن من محل وادي النيل … وتاكل حتة هريسة او بوريك بالجبنة من العصافيري في محطة مصر … لازم تمشي في سوق شيديا وسوق زنانيري وسوق زين العابدين وسوق الميدان وسوق راتب وسوق باكوس … لازم تشم ريحة البن والبحر في شارع بور سعيد .. مروحتش طبعا المكس اشتريت سردين .. واكيد مرحتش حلقة السمك اشتريت سمك بربون ومرجان وجمبري وكابوريا طازة طالعة من البحر الفجر …. عشان تشوف اسكندرية الحقيقية لازم تمشي في شارع النبي دانيال وتشوف اكشاك الكتب .. وتمشي في شارع فؤاد وتتفرج على اقدم مباني العالم .. عشان تحس انك في اسكندرية كان لازم تروح الحضرة والنزهة .. وتروح محرم بك تتفرج على ماتبقى من فلل كانت لاعرق عائلات الجاليات الأجنبية في اسكندرية … امشي في الشوارع الجانبية والحواري والزقايق لتستمع الى اللهجة السكندرية الحقيقية مش المزيفة اللي سمعتها في مسلسل ريا وسكينة .. رحت هانوفيل وبيطاش العجمي ؟ رحت القباري والورديان قعدت على قهوة خفاجى ؟ .. مشيت في شارع 45 وشارع القاهرة وعديت من قدام كشري هدير ؟ أكيد لأ ..
يبقا انت مشفتش اسكندرية
عشان تحس باسكندرية اسال مواطن سكندري عن عنوان عشان يوصفهولك بالتفصيل الممل وممكن يوصلك بنفسه لو فاضي … كل طبق كشري في المدهش في محطة مصر .. كل سندوتشين كبدة عند عم امين او عند ميسو في الرصافة …. روح اوريكا او مكتبة ابو العز الحريري في بوالينو .. تعالى اسكندرية في الشتا وامشي في شارع فؤاد والدنيا بتشتي متجيش في الزحمة في الصيف .
لو جاي اسكندرية لا انصحك انك تيجي في رحلة اليوم الواحد .. او تيجي مع فوج سياحي .. تعالى لوحدك ولا ترتبط باي برنامج زيارات موضوع مسبقا لانك مش حتشوف اسكندرية الحقيقية
اسكندرية مدينة مسالمة وصغيرة وجميلة جداا .. مواصلاتها متوفرة 24 ساعة .. فنادقها رخيصة وجميلة وعريقة وترحب بيك في اي وقت ❤❤ 🏊💙💙
