منوعات
ذكريات من زمن فات..يعني ايه يوم الجمعة في مصر زمان
يعني ايه يوم الجمعة في مصر ايام الزمن الجميل زمان
يعني البيت كله بيصحى بدرى يفطروا مع بعض ويتجمعوا على ترابيزة أو طبلية واحدة.. فطار مصرى أصيل طعمية سخنة وفول وبيض وجبنة وعسل وعيش بلدى.
ويا سلام لو جايلك زيارة من البلد عيش فلاحى وكمان جبنة قريش ومش.. كوباية شاى أصيلة فى كوباية مش مج فنجان قهوة على سبرتاية بوش
تفتح التلفزيون تتفرج على سينما الأطفال ومغامرات الكلبة لاسى.. وثلاث جرائد موجودة، الأهرام والأخبار والجمهورية، ومجلة علاء الدين من اليوم اللى قبله عشان تتقرأ يوم الجمعة.
تسمع خطبة الجمعة من الجامع اللى جمبك أو تتفرج وتسمعها ف التلفزيون والولاد تنزل تصلى صلاة الجمعة مع الكبار بجلاليب بيضا وطواقى شكلهم بيفرح
وحملة نظافة فى كل البيوت وريحة البخور فى كل مكان تسمع القرآن فى كل البيوت.. سورة الكهف تتقرأ ودعوة حلوة من ست الحبايب بعد كل صلاة يمكن تكون ساعة استجابة.
تتفرج على عالم الحيوان وتستنى سر الأرض وتضحك مع القرموطى.. الكل مستنى الساعة 2 حديث الشعراوى بأسلوبه السلس
مع النجوم «ميكى ماوس» عبد الله أحمد عبدالله، ذكريات مع النجوم.. الفيلم العربى اللى بنستناه من الجمعة للجمعة فيلم قديم ومتكرر بس الكل بيحبه وبيتفرج عليه.
برنامج حياتى يحول المشاكل الاجتماعية لعمل درامى جميل ويحلها.. اللعب والأتارى اللى بيطلعوا يوم الجمعة مفيش مذاكرة فيه لعب، النهاردة أجازة
خروجة وفسحة حلوة بنحلم بيها طول الأسبوع موعودين بيها يوم الجمعة عشان سمعنا الكلام.
العيلة كلها تتجمع فى بيت العيلة لعب وضحك وهزار والأمهات كلها ف المطبخ بتجهز أحلى غدا.. والكل يتجمع الساعة 7 مستنين المسلسل العربى الحلقة مالهاش إعادة بعد ساعتين وإلا هانشوفها ع اليوتيوب.
«حديث الروح» قبل نشرة تسعة وأخبار الأسبوع كلها متجمعة فى نهاية الأسبوع
مستنين فيلم السهرة اللى بيخلص بدرى أصل التلفزيون بيقفل وبيعمل
وشششششششششششششششششششششششششششش
